आई

कसा फुटतो पाझर हृदयास माझ्या बाई

येता बाळाची आठवण तळमळतेच आई.

बोल अमृतात भिजून गीत होऊन येतात

आशिर्वादासाठी डोळ्यात निरांजन तेवतात.

कशी उतराई होऊ मला केलेस तू आई

येता बाळाची आठवण तळमळतेच आई.

तुझ्या नाजूक पावलांना होईल आकाश ठेंगणे 

तुझ्या सद्गुणी वागण्याला लाभो मार्दव्याचे लेणे

घेशील तू उंच भरारी आभाळ कवेमध्ये घेई

येता बाळाची आठवण तळमळतेच आई.

तुझ्या राजस रुपाला लाभो संस्काराचे बळ

माझ्या ममता शिस्तीचे मिळो तुला गोड फळ

येता ग्रीष्माची आठवण सय सावलीची येई

येता बाळाची आठवण तळमळतेच आई.

------अभय बापट

२८/१०/२०२५