शब्दयात्री

शब्दात न मावणारे 

शब्द नवे देशील का ?

आनंदाचे पुष्प सारे 

तुज हाती घेशील का ?

जोडली होती नाती 

शब्दांनी नवी- जूनी

एक नाते शब्दवेडे 

तू कधी स्मरशील का ?

शब्दांनी राखले कायम 

इमान अर्थांशी,

नीति सोडल्या माणसांना 

अर्थ खरा सांगशील का ?

शब्द सारे मुक झाले 

वाचाळ मुखांपुढे

मुक शब्दांमागले अर्थ 

तू तरी जपशील का ?

शब्द असतो अर्थ वेडा, 

भावनांचा भुकेला

भावनांचा शब्द सेतू

तू सदा होशील का ?

----- अभय बापट

२४/०७/२०२२