निरर्थकाची डायरी ८

निरर्थकाची डायरी......

माणसं कसली कसली ओझी डोक्यावर घेवून जगत असतात.

       काही स्वत:च्या आनंदासाठी,वेळ आनंदात जाण्यासाठी टिव्ही बघतात आणि सिरियलमधेच गुंतून पडतात. दिवसभर त्या सिरियल्सची वाट बघणं, त्या गोष्टींचाच विचार करत बसणे.

        दुसऱ्या प्रकारची लोक, त्यांना या सिरियल्स अजिबात आवडत नाहीत, त्या सिरियल्सचा द्वेष करतात, त्या चालू असताना टिव्हीसमोर बसणे ही त्यांना जमत नाही.

         खरे म्हणजे या सिरियल बघणे म्हणजे निव्वळ हमाली, खोट्या गोष्टीतील सुख-दु:खाच्या भावनांचे ओझे स्वत:च्या माथी घेणे.

         कोणताही हमाल डोक्यावरचे ओझे विनाकारण डोक्यावर वागवत नाही,वेळ आली की डोक्यावरुन उतरवून टाकतो,मोबदला खिशात सारतो, पुढे सरतो.

         तसेच त्या सिरियलमुळे झालेला आनंद किंवा मानसिक त्रास ही त्या ओझ्याची बिदागी समजून ते ओझे माथ्यावरुन उतरवून टाकले पाहीजे.

         प्रत्येकवेळी मनपसंद मोबदला मिळेल किंवा नाही,तरी योग्य क्षणी ते ओझे उतरवणेच सर्वोत्तम मार्ग मानसिक शांतीचा.