अंतर

तू निळ्या नभाचा राजा

मी निष्पर्ण धरेची राणी

तुझ्या माझ्या सोबतीचा

करार लिहिला कोणी.

कोणी लिहिली माथी

सटवाईची अदृष्य लिपी

नकळत जोडून जातात

ही जन्मभराची नाती.

ही ओढ कुठूनी येते

अलवार रंग गंधाची

पटवून ओळख देते

खूण जन्म जन्माची.

पैलतीरावरुन येतो

पाव्याचा नाजूक सूर

पुन्हा पावले माझी

जातात निघून दूर

तू कृष्ण होतास तेव्हा

मीच होते का रे राधा

नावाविना नात्याची

का मलाच होते बाधा.

-----अभय बापट

२९/०३/२०२६